NBA deildin að fá lán upp á 175 milljónir dollara

Boðið hefur verið út lán upp á 175 milljónir dollara sem Bank of America og JPMorgan hafa sölutryggt fyrir NBA deildina.  Hugmyndin er að hafa þessa peninga sem öryggisnet fyrir þau lið deildarinnar sem eru í, eða gætu lent í vandræðum vegna lánsfjárkrísunnar sem heimurinn er á kafi í.  Deildin tekur það samt fram að hún sjálf þurfi ekki á láninu að halda, heldur vilji geta komið liðum deildarinnar til hjálpar verði þess þörf, og hafi fyrrnefndir bankar haft frumkvæði að þessu útboði.  Lánið kemur samt sem áður til viðbótar við 1,7 milljarða dollara yfirdrátt sem deildin tók áður gegn veði í útsendingarrétti.

Lánakjörin eru 100 milljónir í sjö ár á 8,27% vöxtum og 75 milljónir í fimm ár á 7,45% vöxtum.  Þrátt fyrir að þetta sé 200-300 punktum yfir því sem deildin hefði fengið fyrir krísuna þá verða þetta að teljast þokkaleg kjör miðað við ástandið.

15 af 30 liðum deildarinnar hafa nú þegar óskað eftir láni frá deildinni og mun hvert lið því geta fengið að hámarki 11,66 milljónir dollara.  Dropi í hafið að mínu mati þar sem sum liðin hafa gefið upp að hjá sér stefni í allt að 20-50 milljóna dollara tap á síðasta fjárhagsári.  Þau lið sem hafa verið rædd í þessu samhengi eru t.d. Orlando Magic, Sacramento Kings, Atlanta Hawks, New Orleans Hornets, Memphis Grizzlies, Philadelphia 76ers.  Orlando og Sacramento eru staðfest og hin aðeins orðrómur.

Hookup:  SportsBusiness Journal