Verður Brandon Jennings nýja gæludýr deildarinnar?

Nýliðinn Brandon Jennings hefur heldur betur komið mörgum - ef ekki öllum - skemmtilega á óvart það sem af er tímabilinu.  Í þeim 11 leikjum sem hann hefur leikið fyrir Bucks hefur hann sett yfir 25 stig að meðaltali; 4,4 fráköst; 5,5 stoðsendingar; einn stolinn bolta í leik og með aðeins 3,4 tapaða bolta - svo ekki sé talað um 48% skotnýtingu.  Hreint ótrúlegar tölur fyrir nýliða sem fáir höfðu trú á, þar með talið ég.  Útlitið var ekki gott í sumar þegar hann lét dæluna ganga í viðtali sem óvart lak út.

Öllum að óvörum er þarna um að ræða mikinn vinnuþjark sem tilbúinn er að leggja mikið á sig til að ná árangri, þrátt fyrir að hafa ákveðið að sækja reynslu til Evrópu frekar en í háskólaboltanum.  Alltaf mættur fyrstur á gólfið fyrir hvern leik og tekur yfir þúsund skot á dag til að halda strokunni góðri.

Nú nýlega ákvað ESPN að breyta sýningartímum sínum til þess að ná leik með Jennings og Bucks í beina útsendingu yfir öll Bandaríkin sem hefur ekki gerst í langan tíma.  Fram að þessu var Bucks liðið algerlega gleymt og ekki leit út fyrir góðan vetur hjá þeim þar sem þeir höfðu látið Charlie Villenueva frá sér fara og með Michael Redd í meiðslum.  En viti menn nú standa þeir í þriðja sæti austurdeildarinnar með lið eins og Boston Celtics og Cleveland Cavaliers fyrir neðan sig og stór ástæða fyrir því er smávaxinn og horaður bakvörður að nafni Brandon Jennings.

Myndböndin hér að neðan sýna stutt innslag frá NBA-TV um 55 stiga leikinn hans gegn Golden State þar sem hann mætti öðrum öflugum nýliða, Stephen Curry og einnig viðtal við hann eftir leikinn.