Frábær frammistaða hjá Grindavík

Ég sagði um daginn að Grindavík ætti ekki sjens í þetta KR lið nema þeir færu að spila 40 mínútur af sínum besta körfubolta.  Það var heldur betur nákvæmlega það sem gerðist í Grindavík í gærkvöldi.  Grindjánar mættu tilbúnir og hungraðir í sigur.  KR byrjuðu hins vegar leikinn af þvílíkum krafti með troðslum og hraðaupphlaupum frá Jason Dourisseau.  Átti nú erfitt með mig að hlæja ekki þegar hann skoraði úr einu hraðaupphlaupinu snemma í leiknum og setti tvo Grindvíkinga í gólfið á afturendann með gabbhreyfingum.

Frikki Ragnars sagði við Brenton að hann þyrfti að hoppa í tímavélina og fara ca. fimm ár aftur í tímann.  Hinn 37 ára gamli BB setti heldur betur í fluggírinn og spilaði sinn langbesta körfubolta sem ég hef séð hjá honum lengi.  28 stig (10/16), 6 stoðsendingar, 8 fráköst, 3 stolnir boltar og aðeins 2 tapaðir eftir 37 mínútna leik.  Þvílík tölfræði hjá gamla manninum.  Ekki veitti af því PAxel er augljóslega engan veginn nálægt sínu besta formi og var sýnilega við 25% getu.  Helgi Jónas átti mjög góðan leik framan af en þurfti að fara af leikvelli vegna einhverra eymsla í fæti.  Var með 12 stig eftir aðeins 18 mínútur.  Arnar Freyr var "flottur" eins og venjulega og felldi Jason í hraðaupphlaupi eftir stolinn bolta, en í þetta sinn fór það ekki framhjá dómurunum og hann uppskar óíþróttamannslega villu.  Nick Bradford hefur átt betri leiki en það fer ekki framhjá neinum að hjartað er á réttum stað í þeim leikmanni. 

KR-ingar voru að mörgu leyti á hælunum allan leikinn.  Sóknin var ekki að flæða og vörnin oft á tíðum götótt.  Menn voru farnir að þvinga hluti í gegn og henda upp þriggja stiga skotum eins og allt annað væri bannað.  Dourisseau var þó frábær í sínum leik með 22 stig og 15 fráköst og sýndi tilþrif sem maður er enn að átta sig á.  Eitthvað sem maður sér ekki svo glatt í íslenskum körfubolta.  Helgi virðist stíga upp alltaf þegar á þarf en hann setti 21 stig og reif niður 10 fráköst.  Lítið fór fyrir Kobba en Jón Arnór var oftar við stýrið í sókninni og átti nokkrar fáránlega flottar stoðsendingar inn í teiginn.  Hann setti 16 kvikindi og gaf 12 stoðsendingar.  Hann átti einnig rugl hreyfingar sem maður er enn að velta fyrir sér hvort hafi í raun átt sér stað hérna á Íslandi.  Sæll!  Fannar var algerlega fjarverandi og þarf að rífa sig upp fyrir næsta leik.

Þetta feiknasterka KR lið virðist ætla að eiga í erfiðleikum með heimavöll Grindavíkur.  Er því óhætt að segja að KR-ingar séu nú eiginlega með bakið upp við vegg og verða að vinna leikinn í DHL höllinni á fimmtudaginn, þar sem þeir virðast ekki geta treyst á sigur á útivelli.  En þetta er það sem gerir körfuboltann og þá sér í lagi úrslitakeppnina svona skemmtilega.  Staðan er 1-1 og ætlar þetta að verða mjög skemmtileg úrslitarimma.

Grindavík sigraði KR