Er regluverk KKÍ upp á punt?

Ég verð að viðurkenna að mér fannst það slakt hjá KKÍ að leyfa Snæfelli að koma með Jeb Ivey inn núna í sjálfum úrslitunum.  Mér tókst hins vegar ekki að finna neitt í reglugerðum KKÍ sem mælti á móti því.  Það tók hins vegar steininn úr þegar ég sá að Nick Bradford væri búinn að skipta um lið og kominn til Keflavíkur á nánast ljóshraða með blessun deildarinnar.  Bradford lék með Njarðvík í vetur og finnst mér einkennilegt að reglur deildarinnar um félagaskipti séu hér kengbeygð eftir þörfum liðanna.

Í reglugerð KKÍ um erlenda leikmenn segir eftirfarandi:

Erlendum leikmanni er heimilt, með samþykki þess félags sem hann spilaði síðast hjá að skipta um félag hérlendis. Erlendur leikmaður sem óskar félagsskipta verður löglegur með hinu nýja félagi þegar félagaskipti hafa verið samþykkt af KKÍ.

Erlendum leikmönnum er einungis heimilt að ganga í annað íslenskt félagslið ef fram hefur komið skriflegt samþykki þess félags sem hann hyggst ganga úr.

Ég gef mér því að Njarðvík hafi samþykkt þessi skipti, en þá kemur að öðrum þætti reglugerðarinnar sem ég býst við að sé rétthærri þessari málsgrein hér að ofan:

Sömu reglur gilda fyrir erlenda leikmenn og íslenska leikmenn, nema annað sé tekið fram.

Um félagaskipti segir hins vegar í reglugerð KKÍ:

Annar hluti keppnistímabils telst vera frá 6. febrúar til 31. maí og eru félagaskipti á þeim tíma með öllu óheimil.

Hvernig ætlar KKÍ að útskýra og verja þessa ákvörðun sína?  Ég er ekki að verja gjörðir Snæfellinga með Jeb Ivey en svo virðist sem það sé gat í reglugerðum KKÍ hvað það varðar en þessi félagaskipti Bradfords sýnist mér vera hrein og bein brot á reglugerðum, nema úrslitin séu orðin partur af Evrópukeppninni sem KKÍ veitir aðeins undanþágur vegna. 

Meiðsl eru partur af leiknum og þurfa minni spámenn að stíga upp þegar lykilleikmenn detta út og þurfa liðin að rúlla með höggunum að mínu mati.  Þetta er bara vitleysa.

Nick Bradford í Keflavík á ný

Athugasemdir

[RIP (IP-tala skráð) 23.4.2010 kl. 18:32]

Hvernig færðu það út að það sé munur á þessum félagsskiptum... það er ekkert talað um hvort félagsskitin verði að vera erlendis frá...

Þannig að ef reglan ætti að gilda um skipti Bradford milli Nja og Kef þá gildir hún líka um skipti Jeb frá Finnlandi til Snæ

[Unnþór (IP-tala skráð) 23.4.2010 kl. 18:39]

Reglugerðarákvæðin leyfa þetta, það þarf bara að rýna betur í þau.

Í 2. málgrein 1. gr. a. reglugerðar KKÍ um félagaskipti segir: ,,Félagaskipti og hlutgengi annarra en íslenskra ríkisborgara fer eftir reglugerð um erlenda leikmenn."

Því fer um félagaskipti erlendra leikmenn eftir reglugerð um erlenda leikmanna og breytir því ekki hvað reglugerð um félagaskipti segir.

[President (IP-tala skráð) 23.4.2010 kl. 19:38]

Mér finnst bæði þessi félagaskipti KKÍ til skammar.

Hvers konar rugl er þetta að liðin geti bara styrkt sig þegar komið er í úrslitin.

Algjört djók að horfa upp á þetta.

[Rúnar Birgir Gíslason, 23.4.2010 kl. 20:17]

Unnþór er með þetta.

Reglugerð um félagaskipti nær ekki yfir kana, þar gildir reglugerð um erlenda leikmenn og þar eru engin deadline.

[Skarfurinn, 23.4.2010 kl. 20:26]

Það er fáranlegt að þetta skuli leyfast, að kani geti semsagt spilað með tveimur liðum í sömu úrslitakeppninni, með þessu geta liðin keypt sér titilinn allt fram í síðasta leik.

[Baldur (IP-tala skráð) 23.4.2010 kl. 20:30]

Siðleysi Keflvíkinga hefur alltaf verið með ólíkindum, en að UMFN samþykki svona er skammarlegt.  Héðaní frá áfram snæfell

[P.Gunnars (IP-tala skráð) 23.4.2010 kl. 21:11]

Baldur hver er munurinn á þessu??????

[Jason Orri (IP-tala skráð) 23.4.2010 kl. 21:22]

Leið og ég sá þetta á stöð 2 í kvöld þá sagði ég bara upphátt, þetta er ekki löglegt. Í NBA er ekkert hægt að skifta leikmönnum í miðri úrslitakeppni. Eins og Kevin Garnett væri sendur til Miami fyrir Dwyane Wade meðan sérían væri enn í gangi.

KKÍ fær erfitt verkefni næstu vikuna

[Unnþór (IP-tala skráð) 23.4.2010 kl. 21:45]

Enda er Iceland Express deildin og NBA ekki fyllilega sambærileg. Ég er ekki að segja að þetta sé réttlátt regla, en það er mikill munur á þessum deildum. Kanar spila sérstakt hlutverk í þessari deild. Þeir koma hér sem atvinnumenn og eru oftast besti leikmaðurinn í liðinu.

Það er líka dálítill munur að sjá Jeb Ivey koma frá Finnlandi og fylla í skarðið fyrir Sean Burton og að sjá Nick Bradford koma frá Njarðvík, nýbúinn að detta út á móti Keflavík, og spila fyrir Keflavík. Þetta er þó leyfilegt og það er skiljanlegt að Keflavík geri þetta ef Burns er úr leik. Spurningin er bara hvort að KKÍ ráðist í reglugerðarbreytingu eftir þetta.

[Siggi (IP-tala skráð) 23.4.2010 kl. 23:22]

Þetta er bara eitt mesta kjaftæði sem ég hef heyrt. Til hvers er yfirhöfuð verið að skrá kanana, afhverju velur ekki bara hvert lið einn kana fyrir hvern leik og síðan annan fyrir næsta leik. Ég get svo svarið það að það er ekki vitlausari hugmynd en þetta rugl menn gætu bara boðið í gaurana leik fyrir leik.

Vissulega er IE deildi ekki NBA eins og Unnþór bendir réttilega á. En þetta er fyllilega sambærilegt við til að mynda pepsideildina í fótboltanum hér. Mörg lið reyna að ná sér í dýra og sterka útlendinga, sem eru oftar en ekki bestu menn í liðunum sínum. En þar er deadline á félagaskiptum eins og í öllum siðmenntuðum keppnum. Menn verða bara að bíta í það súra ef að besti maðurinn meiðist, það ætti bara að hvetja liðin til að leggja meiri áherslu á dýptina en ekki bara eina eða tvær stjörnur. Held að það myndi leiða af sér miklu skemmtilegra mót í framtíðinni.

[Emmcee, 24.4.2010 kl. 00:40]

Ég held að það sé deginum ljósara að stjórnendur KKÍ þurfi að leggjast undir feld eftir þetta tímabil og endurskoða regluverkið, því fyrir mér þá ganga þessar tvær reglugerðir þvert á hvor aðra.  Reglugerðin um félagaskipti vísar á reglugerð um erlendaleikmenn í þessu samhengi.  Reglugerð um erlenda leikmenn hins vegar gefur skýrt til kynna að sömu reglur gangi jafnt yfir íslenska leikmenn sem og erlenda, nema annað sé tekið fram og sé ég hvergi annað tekið fram í þessu samhengi.

@ Unnþór og Rúnar:  Eruð þið semsagt að segja að nóg sé fyrir lið sem vill fá erlendan leikmann frá öðru liði, að fá samþykki liðsins sem hann var hjá til þess að hann fái leikheimild með nýja liðinu?  Eftir þessu að dæma er þetta ekkert háð neinum afskiptum frá KKÍ.

Ef svo er finnst mér þetta að öllu leyti óeðlilegt og sambandinu ekki stætt af öðru en að taka þessar reglugerðir til endurskoðunar.  Maður skilur það að lið vilji kannski spara sér kostnaðinn af útlendingi fram að úrslitakeppni en rosterarnir ættu að vera læstir um leið og hún hefst.

[Óli Þóris (IP-tala skráð) 24.4.2010 kl. 01:27]

Ég tek undir með Emmcee. Eftir þessu að dæma er þetta ekkert háð neinum afskiptum frá KKÍ, sem er undarlegt.

Held að KKÍ verði að taka þetta fyrir. Hver er þá tilgangur þessarar reglugerðar á annað borð? Þjálfarar, leikmenn, bloggarar og áhorfendur standa á gati þessa daganna. Þetta þarf að vera skýrt. Trúverðugleiki sambandsins er í húfi.

ps Styttist í Texas baráttuna, Spurs - Mavs. Duncan mun eiga stórleik og Spurs vinna.

[Emmcee, 24.4.2010 kl. 01:29]

Góð grein frá Rúnari Gísla dómara um málið...  útskýrir margt.

http://karfan.is/frettir/2010/04/23/reglugerd_kki_um_felagaskipti

[Unnþór (IP-tala skráð) 24.4.2010 kl. 08:49]

"Reglugerð um erlenda leikmenn hins vegar gefur skýrt til kynna að sömu reglur gangi jafnt yfir íslenska leikmenn sem og erlenda, nema annað sé tekið fram og sé ég hvergi annað tekið fram í þessu samhengi."

Nú, mér finnst það skýrt tekið fram Í 2. málgrein 1. gr. a. reglugerðar KKÍ um félagaskipti ,,Félagaskipti og hlutgengi annarra en íslenskra ríkisborgara fer eftir reglugerð um erlenda leikmenn." Ég myndi segja að þessi setning falli undir "annað tekið fram".

Ég er ekki beint versaður í regluverki KKÍ þannig að ég get ekkert sagt til um hvort þetta sé háð afskipti KKÍ eða ekki. Annars er ég sammála þér að það þarf að breyta þessum reglum, a.m.k. gera þær skýrari.

[Emmcee, 24.4.2010 kl. 21:34]

Gott og vel.  Þetta er allt leyfilegt og innan ramma reglnanna (hversu óljós sem hann er). 

Það sem veldur mér hins vegar hugarangri núna er að heyra Sigurð Ingimundarson í viðtali í leiknum í dag segja að þetta sé fyrsta tímabilið sem þessi regla gildi.  Var þessi regla semsagt sett á þinginu sl. sumar?  Ég gat ekki séð að Siggi væri parsáttur við þessa reglu þó hann hafi viljað sem minnst tjá sig um hana. 

Er þetta vilji sambandsins og umfram allt vilji liðanna í deildinni?  Deildin hefur aldrei verið sterkari en núna þetta tímabilið og tel ég þátt Bandaríkjamanna í þeirri þróun fara minnkandi.